திங்கள் நியூஸ்

-சுகாதாரப் பிரதியமைச்சரின் பிரத்தியேகச் செயலாளர் சப்றாஸ் பிரதம அதிதி-                                              
                          (    ஏ.எல்.ஏ.றபீக் பிர்தௌஸ் )
சிறுநீரக நோய்த்தடுப்பு ஜனாதிபதி செயலணியின் பணிப்பில் சுகாதார பிரதியமைச்சர் பைசால் காசிமின் வழிகாட்டலில் 'நிந்தவூர் பிரதேசத்திலுள்ள நீரிழிவு நோயாளர்களை விழிப்புணர்வூட்டும் நிகழ்வும், இலவச மருத்துவப் பரிசோதனையும், சிகிச்சையளிக்கும் நிகழ்வுகளும் இன்று(12) நிந்தவூர் தொற்றா நோய் ஆயூர்வேத ஆராட்சி நிலையத்தில் இடம் பெற்றன.

நிந்தவூர் தொற்றா நோய் ஆயூர்வேத ஆராட்சி வைத்தியசாலைப் பணிப்பாளர் வைத்தியர் கே.எல்.எம்.நக்பர் தலைமையில் இடம்பெற்ற இந்நிகழ்வுகளில் சுகாதாரப் பிரதியமைச்சரின் பிரத்தியேகச் செயலாளர் எம்.ரி. முகம்மட் சப்றாஸ் பிரதம அதிதியாகக் கலந்து கொண்டு சிறப்பித்தார்.

மேலும் இந்நிகழ்வில் பிரதேச செயலக அபிவிருத்தி உத்தியோகத்தர் திருமதி.ஏ.ஹில்மியா, ஆயூர்வேத ஆராட்சி நிலைய அபிவிருத்தி உத்தியோகத்தர் எஸ்.எம்.றியால்டீன் ஆகியோர் கௌரவ அதிதிகளாகவும் கலந்து கொண்டனர்.

இன்றைய தினம் 120க்கு மேற்பட்ட நிந்தவூர் பிரதேசத்திலுள்ள நீரிழிவு நோயாளர்களுக்கு விழிப்புணர்வு ஊட்டப்பட்டதோடு, இலவச மருத்துவ பரிசோதனைகளும், சிகிச்சைகளும் வழங்கப்பட்டன.
பரிசோதனைகளுக்காகப் பசித்திருந்த அனைவருக்கும் இயற்கை மூலிகைத் தாவரங்கலந்த இலைக்கஞ்சியும், முட்டைகளும் வழங்கப்பட்டன.மேலும் அவர்களுக்கு இரு வாரங்களுக்குத் தேவையான மருந்துகளும் வழங்கப்பட்டன.

இது போன்ற நிகழ்ச்சிகள் எதிர்காலத்தில் இவ்வைத்தியசாலையினூடாக ஏனைய பிரதேச செயலகங்களுக்குட்பட்ட பகுதிகளிலும் நடாத்துவதற்கு திட்டமிடப்பட்டுள்ளதுடன், மாதத்தில் 2வது மற்றும் 4வது வாரங்களில் ( செவ்வாய் கிழமைகளில் ) இதே போன்று தொற்றா நோயாளர்களுக்கான கிளினிக்குகளும் இவ்வைத்தியசாலையில் தொடராக நடாத்துவதற்குத் திட்டமிட்டுள்ளதாகவும் ஆயூர்வேத ஆராட்சி வைத்தியசாலைப் பணிப்பாளர் கே.எல்.எம்.நக்பர் தெரிவித்தார்.

அவர் தொடர்ந்தும் இங்கு கருத்துத் தெரிவிக்கையில்:- 'எமது இந்த ஆயுர்வேத ஆராட்சி வைத்தியசாலையில் உங்களுக்குத் தேவையான அனைத்து மருந்து வகைகளும் இருக்கின்றன. நீரிழிவு , கொழுப்பு, இரத்தழுத்தம் போன்ற பல்வேறு பெறுமதியான பரிசோதனைகள் இலவசமாக இடம் பெறுகின்றன. இவற்றை அனுபவியுங்கள். இவற்றுக்காக உழைத்து வருபவர்களுக்கு இறைவனிடம் பிரார்த்தனை புரியுங்கள்' எனக் கேட்டுக் கொண்டார்.

பிரதியமைச்சரின் பிரத்தியேகச் செயலாளர் எம்.ரி. முகம்மட் சப்றாஸ் இங்கு கருத்துத் தெரிவிக்கையில்:- 'இந்த வைத்தியசாலையை 2020ம் ஆண்டுக்குள் அதற்குரிய காணியில் முழுமையாக கட்டி முடித்துவிட வேண்டுமென்று நமது பிரதியமைச்சர் கடினமாக உழைத்து வருகிறார். விரைவில் அதற்கான பணிகள் ஆரம்பிக்கப்படவுள்ளன. நாங்கள் இலங்கையின் நாலாபக்கங்களிலுமுள்ள இது போன்ற வைத்தியசாலைகளுக்குச் சென்று பார்த்திருக்கின்றோம். அவைகளோடு ஒப்பிடுகையில் நமது வைத்தியசாலையில் நடைபெறுகின்ற சேவைகள் அதிகமென்றுதான் சொல்ல வேண்டும். இதற்குக் காரணம் எமது வைத்தியசாலைகளில் பணியாற்றி வரும் வைத்தியர்கள், ஏனைய உத்தியோகத்தர், ஊழியர்களின் தியாகமே! எனவே, அவர்களின் நல்வாழ்வுக்காகப் பிரார்த்திக்க வேண்டியது நமது கடமையாகும்' எனத் தெரிவித்தார்.











 

                                    ( ஏ.எல்.ஏ.றபீக் பிர்தௌஸ் )
அம்பாரை மாவட்டத்தில் சாய்ந்தமருது பிரதேச சபைக்குட்பட்ட கரவாகு வயல் பிரதேசத்தை ஊடறுத்துச் செல்லும் கப்பல்ல பாலம் எனுமிடத்தில் இனந்தெரியாத ஆணின் சடலமொன்று கண்டெடுக்கப்பட்டுள்ளது.

இச்சடலம் பல நாட்கள் ஆற்று நீரில் அமிழ்ந்திருந்து நேற்று(09) மீட்கப்பட்ட நிலையில் உடலின் சில பாகங்கள் அழுகியதாகக் காணப்படுகிறது. சுமார் 45 வயது மதிக்கத்தக்க ஒரு ஆண்மகன். சடலத்தின் நாக்கு வெளியே தள்ளிய நிலையில் உடல் ஊதிப்பெருத்துக் காணப்படுகிறது. கறுப்பு நிற பொட்டன் எனும் காற்சட்டையும், வெள்ளை நிற சேட்டும் அணிந்த நிலையில் சடலத்தின் இடது கையில் இரண்டு காப்புக்கள் அணிந்து காணப்படுகிறது.

இச்சடலம் இவ்விடத்திற்கு எவ்வாறு வந்தது?, இது கொலையா? தற்கொலையா? கழுத்து நெரித்துக் கொன்று விட்டுப் பின்னர் ஆற்றில் தூக்கி வீசப்பட்டுள்ளதா? அல்லது வலிப்பு நோயுள்ளவரா? அல்லது வேறு எங்கோ உள்ள சடலம் ஆற்று நீரில் அடிபட்டு வந்துள்ளதா? போன்ற பல்வேறு சந்தேகங்கள் இதன்மேல் தோன்றுகிறது. இனங்கண்டு சடலத்திற்கு உரிமை கோருவதற்கு எவரும் முன்வராத காரணத்தால் எந்த இனத்தைச் சேர்ந்த சடலம் என்பதும் கேள்விக் குறியாகவே உள்ளது! 

சடலத்தை நேரடியாகப் பார்வையிட்டு, பொலிசார் - அருகிலுள்ளோர் போன்றவர்களை விசாரணை செய்த சம்மாந்துறை நீதிவான் நீதிமன்ற பதில் நீதிபதி ஏ.எம்.நஸீல் ' சடலத்தை உறவினர் எவராவது வந்து இனங் காட்டும் வரை, இன்றிலிருந்து 14 நாட்களுக்கு அம்பாரை போதனா வைத்தியசாலை பிரேத அறையில் பாதுகாப்பாக குளிரூட்டி வைக்குமாறும், 14 நாட்கள் கடந்தும் எவரும் இனங்காட்டத் தவறினால், அரச செலவில் சடலத்தைப் புதைப்பதற்கு நடவடிக்கை மேற்கொள்ளுமாறும்' பொலிசாருக்கு உத்தரவு பிறப்பித்தார்.

தற்போது சடலம் அம்பாரை போதனா வைத்தியசாலை பிரேத அறையில் வைக்கப்பட்டுள்ளது. இது வரை எவரும் சடலத்தை இனங்காட்டவில்லை. சடலம் இனங்காட்டப்பட்ட பின்னரே ஏனைய விசாரணைகளைத் தொடர முடியுமெனவும், சடலத்தை இனங்காண்பதற்குப் பொது மக்களின் உதவியை எதிர்பார்ப்பதாகவும் சம்மாந்துறைப் பொலிஸ் நிலைய பொலிஸ் பரிசோதகர் எம்.எஸ்.அப்துல் மஜீட் தெரிவித்தார்.

சம்மாந்துறைப் பொலிஸ் நிலையப் பொறுப்பதிகாரி கே.எம்.இபுனு ஹஸார் அவர்களின் விசேட பணிப்பின் பேரில் பொலிஸ் பரிசோதகர் எம்.எஸ்.அப்துல் மஜீட் தலைமையில் இது தொடர்பான மேலதிக விசாரணைகள் முன்னெடுக்கப்படுகிறது. 

  -மாகாணக் கல்விப் பணிப்பாளர் நிசாம் பிரதம அதிதி-
                           ( ஏ.எல்.ஏ.றபீக் பிர்தௌஸ் )
நிந்தவூர்க் கோட்டப் பாடசாலை மாணவர்களுக்கிடையில் 'பொலித்தீனுக்கு மாற்றுப் பொருள் என்ன' எனும் தலைப்பில் நிந்தவூர் நலன்புரிச் சபை நடாத்திய சித்திரம், கட்டுரை, மற்றும் பேச்சுப் போட்டிகளில் பங்கு கொண்டு வெற்றி பெற்ற மாணவ மாணவிகளைக் கௌரவிக்கும் நிகழ்வும், சித்திரக் கண்காட்சியும் நேற்று நிந்தவூர் அல்-மஸ்ஹர் பெண்கள் உயர்தரக் கல்லூரியில் இடம்பெற்றது.

முன்னாள் மாகாணக் கல்விப்பணிப்பாளரும், நிந்தவூர் நலன்புரிச் சபைத் தலைவருமான எம்.எச்.யாக்கூப் ஹசன் தலைமையில் நடைபெற்ற இந்நிகழ்வுகளில் கிழக்கு மாகாணக் கல்விப் பணிப்பாளர் எம்.ரி.அப்துல் நிசாம் பிரதம அதிதியாகக் கலந்து கொண்டு சிறப்பித்தார்.

மேலும், இந்நிகழ்வுகளில் நிந்தவூர் கோட்டக் கல்விப் பணிப்பாளர் திருமதி.ஜிஹானா அலீப், தென்கிழக்குப் பல்கலைக் கழக சிரேஷ்ட விரிவுரையாளர் ஏ.ஏ.நசீர் அஹமட், கல்முனைக் கல்வி வலய முன்பள்ளி உதவிக் கல்விப் பணிப்பாளர் எம்.ஏ.எம்.றசீன், அம்பாரை மாவட்ட நீர்வழங்கல் பிரதம பொறியியலாளர் ரி.இஸ்மாயில், அமைப்பின் நிகழ்ச்சித் திட்டப்பணிப்பாளர் யூ.எல்.உமர் அலி, பாடசாலை அதிபர்கள், ஆசிரியர்கள், மாணவர்கள் எனப்பலரும் கலந்து கொண்டு சிறப்பித்தனர். 

போட்டிகளில் தெரிவு செய்யப்பட்ட மாணவ, மாணவிகளுக்குப் பெறுமதியான பரிசில்களும், சான்றிதழ்களும் அதிதிகளால் வழங்கி, கௌரவிக்கப்பட்டது.

மாகாணக் கல்விப் பணிப்பாளர் எம்.ரி.அப்துல் நிசாம் இங்கு கருத்துத் தெரிவிக்கையில்:- ' ஒரு சிறந்த ஓவியன் எதையும் நேரியதாகப் பார்க்கின்ற பண்புடையவனாக இருப்பான். சமூதாயத்தை அல்லது சூழலைப் பார்க்கின்ற போது, அந்த சூழலில் எது கோணலாக இருக்கின்றதோ, அதைச் சரியாக அல்லது, நேரியதாக உருவாக்க வேண்டும் என்று நினைப்பவன்தான் ஓவியன். எனவே நல்ல சமுதாயத்தை உருவாக்குவதில் ஓவியனின் பங்கும் அழப்பரியது' எனத் தெரிவித்தார்.

-தென்கிழக்குப் பல்கலைக்கழக வேந்தர் கலாநிதி இஸ்ஷாக் பிரதம அதிதி-
                        ( ஏ.எல்.ஏ.றபீக் பிர்தௌஸ் )
நிந்தவூர் நலன் புரிச்சபையின் வருடாந்த ஒன்று கூடலும்,  NWC செய்திச் சஞ்சிகை வெளியீடும் நேற்று நிந்தவூர் அல்-அமீர் பிளேசில் இடம் பெற்றது.

முன்னாள் மாகாணக் கல்விப் பணிப்பாளரும், நிந்தவூர் நலன் புரிச்சபைத் தலைவருமான எம்.எச். யாக்கூப் ஹசன் தலைமையில் இடம் பெற்ற இந்நிகழ்வுகளில் தென்கிழக்குப் பல்கலைக்கழக வேந்தர் கலாநிதி எம்.எம்.இஸ்ஷாக் பிரதம அதிதியாகக் கலந்து கொண்டு சிறப்பித்தார்.

மேலும் இந்நிகழ்வுகளில் நிந்தவூர் பிரதேச செயலாளர் திருமதி.றிபா உம்மா ஜலீல், உதவிப் பிரதேச செயலாளர் அஸ்சேஷ்.ரி.எம்.எம்.அன்சார் நளீமி, தென்கிழக்குப் பல்கலைக்கழக சிரேஷ்ட விரிவுரையாளர்களான ஏ.ஏ.நசீர் அஹமட், ஏ.ஜமால்டீன் உள்ளிட்ட கல்விமான்கள், உலமாக்கள், வைத்தியக்கலாநிதிகள் எனப்பலரும் கலந்து கொண்டனர்.

நிந்தவூர் நலன் புரிச்சபைத் தலைவர் எம்.எச். யாக்கூப் ஹசன் கருத்துத் தெரிவிக்கையில்:- 'எமது நலன்புரிச் சபை மூலம் உருவாக்கியிருக்கும் வட்டியில்லா வங்கியில் தற்போது ஒரு கோடியே 30 இலட்சம் இருக்கிறது. ஆரம்பித்த ஒரு வருடகாலத்துக்குள் 10 மில்லியனுக்கு மேல் ஏழை மக்களுக்காக உதவி செய்துள்ளோம். இறைவன் நாடினால் இன்னும் அதிகமாகச் செய்யவிருக்கிறோம். எனவே எல்லோரும் எம்முடன் இணைந்து செயற்படுமாறு அன்பாய் வேண்டுகிறேன்' எனக் கேட்டுக் கொண்டார்.

தென்கிழக்குப் பல்கலைக்கழக வேந்தர் கலாநிதி எம்.எம்.இஸ்ஷாக் இங்கு கருத்துத் தெரிவிக்கையில்:- 'சமூகப் பணிகளில் ஈடுபடுவோர் என்றும் பெருந்தியாகிகளாவர். இவர்களுக்கு இதற்கான கூலி மறுமையில் தான் இறைவனால் வழங்கப்படும். எனவே சமூகத்திலுள்ள சிலரின் ஆதாரமற்ற  குற்றச்சாட்டுக்களுக்கு அஞ்சத்தேவையில்லை. நாம் இறைவனைப் பயந்து நேரான வழியில் சென்றாலே போதும். அது எப்போதும் சமூக சேவையாளர்களைக் காப்பாற்றும்' எனத் தெரிவித்தார்.

இந்நிகழ்வில் ' NWC செய்திகள்' எனும் சிறப்புச் சஞ்சிகையொன்றும் வெளியிடப்பட்டது.  இதன் முதற் பிரதியை நிந்தவூர் நலன் புரிச்சபைத் தலைவர் எம்.எச். யாக்கூப் ஹசன் நிந்தவூர் பிரதேச செயலாளர் திருமதி.றிபா உம்மா ஜலீலுக்கு வழங்கி வெளியிட்டு வைத்தார்.